«Гаеплеләрне эзләргә кирәк»: «Мисс бикини» Казанда 14нче каттан егылып төшеп һәлак булган

Туган көненнән соң берничә көн үткәч һәлак булды

Узган якшәмбедә Казанда «Мисс бикини Россия – 2022» титулына ия булган 23 яшьлек Сабина Сәгаутдинова һәлак булды. Кызның серле үлеме турындагы мәгълүматны «Татар-информ»га аның дусты раслады.

Әле күптән түгел генә, 14 сентябрьдә, кыз үзенең 23 яшьлек туган көнен билгеләп үткән була. Кулланучылар гүзәл кызның социаль челтәрдәге язмалары астына кайгы уртаклашу хәбәрләрен язган. Алар, Сабинаның үлемендә гаеплеләрне эзләргә кирәк, дип саный.

«Аның зур карьерасы, бәхетле тормышы бар иде. Гаеплеләрне эзләргә кирәк!» – дип яза аның танышлары.

Сабина гаиләсенең якын дусты хәбәр иткәнчә, кыз Казанның Идел буе районындагы торак йортның 14нче катыннан якшәмбегә каршы төндә егылып төшкән. Кызны дүшәмбе, 18 сентябрьдә Казанда җирләгәннәр.

«Безнең барыбыз өчен дә бу – коточкыч фаҗига. Хокук саклау органнары моны кем эшләгәнен белергә һәм гаеплеләрне җәзага тартырга тырышырлар дип өметләнәм», – диде ул, агентлык белән сөйләшкәндә.

Модельнең дусты Вероника кызның бик амбициоз һәм тормыш сөючән булуын әйтә.

Сабинаның күптәнге бер танышы сүзләренчә, балачакта алар җәйге лагерьда бер отрядта булган. Кыз ачык һәм игелекле иде, дип сөйли ул. Модель соңгы елда Мәскәүдә яшәгән, ләкин Казанга туганнары янына да еш кайтып йөргән.

«Аның бик күп планнары, перспективалары, карьерасы бар иде...»

Сабина Казанда туып үсә. Аны белгән кешеләр әйтүенчә, кызның тормышы чыннан да бик бай булган. 7 ел музыка мәктәбе, йөзү белән профессиональ дәрәҗәдә шөгыльләнү һәм Идел буе дәүләт физик культура, спорт һәм туризм университетында уку.

1 ел элек, үзенең 22 яшьлек туган көнендә, Сабина танылган америка актеры, режиссеры һәм музыканты Стивен Сигал белән реклама ролигында төшкән.

«Тормышымның искиткеч һәм истә калырлык көне, мин моны монда үз максатларыма ирешү юлында беркайчан да туктамаска кирәклеген искәртү буларак калдырырга телим», – дип язган кыз социаль челтәрләрдә үз профилендә.

2022 елда Сабина Сәгаутдинова Чувашиядә узган «Мисс туризм Россия – 2022» Бөтенроссия матурлык һәм талант конкурсында катнаша. Конкурс нәтиҗәләре буенча Сабина «Мисс Бикини Россия – 2022» титулын ала.

Моннан тыш, кыз «Мисс Татарстан – 2023» бәйгесендә катнаша. «Минем тормышым – даими үсеш», – ди кыз.

Конкурста ул үзенең хыялы – Татарстан Республикасын «Мисс Россия» милли конкурсында тәкъдим итү булуын сөйли.

2023 елның 17 сентябрендә Казанда әлеге ачык һәм максатчан кызның гомере өзелә. Сабинаның әнисе һәм абыйсы калган.

«Аның бик күп планнары, перспективалары, карьерасы бар иде. Аннан көнләшәләр иде. Бәлки ул ниндидер абруйлы кешене кире каккандыр», – дип сөйли агентлыкка Сабинаның дусты Анастасия.

Агентлыкка билгеле булганча, Сабина Сәгаутдинова һәлак булганнан соң, ТР Тикшерү комитеты үтерү турындагы маддә буенча җинаять эше кузгаткан. Тикшерүчеләргә бу бәхетсез көнне ниләр булганын һәм кызның үлеменә нәрсә сәбәп булганын ачыкларга кирәк булачак.