Гүзәлем һәм Салават Миңнехановлар 19 сәгать буе нәрсә өчен газапланганнар?
Җырчы яңа образда төшкән фотосын һәм клип төшерү процессыннан өзек куйган.
Җырчы Гүзәлем ире Салават Миңнеханов белән яңа клип төшергәннәр. Анда Гүзәлем һинд хатын-кызлары кебек сари кигән, Салават та яңа образда. Инстачыларда клип зур кызыксыну уяткан. Тизрәк дәвамын күрәселәре килүен язганнар.
«Миндәге кием хәрәкәтне чикли. Әмма мондый образда оялчан, тыйнак, ягымлы булып күренәсең.
Безнең иҗат тарихында бу клипны төшерү процессы иң авыры булды. 19 сәгать ялсыз диярлек төшердек. Җитмәсә, мин бала имезә торган әни (сез мине аңладыгыз инде), баш авыртты. Әле аяк бармагы авырта, кечкенә генә операция булган иде. Бу газаплануларның нәтиҗәсе шәп булыр дип ышанам», - дип язган җырчы.
Гүзәлемнең виртуаль дуслары бу образын ошатканнар. «Бик шәп» дигәнне ишарәләүче смайликлар тезгәннәр, «сезгә килешә» кебек комментарийлар калдырганнар.
«Җырчының арганлыгы йөзенә чыккан», «Нигә 19 сәгать буе үзегезне газапларга, акчаның җитәсе юк бит», - дип язган инстачылар борчылып.
«Кызлар, чын татар киемнәре тегеп, шуларны киеп төшсәгез иде», - дип язучыга «Бу бит клип төшәр өчен киелгән киемнәр, аңлар-аңламас профессиональ тәнкыйтьчеләр кебек бәя биреп утырмыйк инде. Һаман шул элеккеге әбиләр киеме белән чагыштырмыйк. Элеккеге татар хатыннары һәм әбиләре киемнәрен беребез дә киеп йөрмибез. Барыбыз да заманча киенергә тырышабыз бит», - дип җавап язган берсе.