Гүзәлем балалар бакчасыннан кызын алырга соңга калган өчен тәрбиячегә акча түләгән
Җырчы 15 минутка соңга калган өчен 300 сум түләгән.
Гүзәлем белән Салават Миңнехановларның кызы Мәдинә шәхси балалар бакчасына йөри. Яңа ел алдыннан балалар бакчалары кичке сәгать бишкә кадәр генә эшләде. Гүзәлем бөкедә торып, кызы Мәдинәне алырга 15 минутка соңга калган. Җырчы бу хакта сторис куйган.
Ул 15 минутка соңга калган өчен 300 сум түләгән. «Мин саран кеше түгел, әмма күңелем кайтты. Шундый яхшы кәеф, бүләкләр белән килеп кердем», — дип сөйли ул.
Бактың исә, башка ата-аналарның да 10-15 минутка соңга калган өчен 300 сум штраф түләгәннәре бар икән. «Икенче юлы соңга калмаска яхшы була ул» дигән кебек шәхси балалар бакчасы ата-аналарны шулай тәрбияли икән.
«Мин беркайчан да махсус соңга калып йөрмим, андый очраклар була икән, ул шәһәрдәге бөкеләр аркасында. Балалар бакчасындагы барлык хезмәткәрләргә дә хөрмәт белән карыйм. Мин няняга бер сәгатькә 250 сум түлим. Әмма бу 300 сум белән арттырып җибәргәнсез. Күңелем кайтты», — дип язган җырчы.