Гөлнур Айзат шәп рецепт буенча балык белән бәрәңге пешерергә өйрәтә
Инстачылар телләрен йота язган.
Шагыйрә Гөлнур Айзат үзе генә белә торган рецепт буенча балык белән бәрәңге пешергән. Инстачыларның авыз сулары килгән, комментарийларда шул хакта язганнар.
«Шаһзадә Балык галиҗәнабләрен хуш исле үләндә тәгәрәтеп, яшь бәрәңге кызлары кочагына салып, космонавтлар күлмәге кигездем дә, мичтә чыдамлык дәрәҗәсен тикшердем. Җәмәгать, 1 сәгать түзде Балык патша! Ә без, Касымич белән, биш минутта сындырдык Балык егетен. Бабай бәрәңге кызларын бик тәмләмәде, үз чамасын белә, ә миңа ник Бәрәңге короле үзе басып тормый — егам да салам, гайрәт җитә. Космонавтны чишендергәч, кем май сибеп ашар, кем болай гына, без лимон сыгып ашадык», — дип язган шагыйрә.