Гөлназ Шәрипҗанова мунча керү тәртибен исенә төшерә

"Эх, бу авыл мунчасы! Карт әбинең кара мунчасы искә төште. Кечкенә чагымда шунда кайта идек юынырга (Азнакай районы Карамалы авылы). Ул вакытта зууур, кап-кара, нык кызу мунча. Ләүкәдә утырасын янып-пешеп, кереңне чыгарып. Мунчаны кем кертсә дә, алгоритмы бер үк иде: морҗаның кара тимер ишеген ачып җибәреп, эссе салып, себеркене пешерә иде. Аска идәнгә төшеп чәчне юасың "Каен" ("Березка") шампуне белән. Кер сабынын юкә мунчаласына ышкып, башта арканы ышкып бирәләр иде, аннары узең бөтен тәнеңне ышкыйсың. 

Шул моментны түзә идем, чөнки соңыннан салкынча рәхәт су белән коендырып чыгарып җибәрәләр иде.

Ә хәзер мин узем акырта-бакырта балаларымны юындырам", - дип язган Гөлназ.