Гөлназ Сәфәрованың ТМТВ премиясе тантанасына кигән күлмәкләрен әбисе дә ошатмаган
Алып баручы әлеге чарага ике образ сайлаган.
Татарстанның атказанган артисты Гөлназ Сәфәрова ТМТВ премиясе тантанасында озын һәм кыска күлмәк киеп чыкты.
Кыска күлмәкне инстачылар да ошатмаган, ә Гөлназның әбисе ике күлмәген дә ошатмаган. Ә үзе исә фотоларын күргәннән соң «ябыгырга кирәк» дигән фикергә килгән.
Ул кыска күлмәктән сәхнәгә чыгып барган видеосын куйган. Беренче булып Данир Сабиров комментарий калдырган: «Исән йөр, бәбкәм, операторыңа Ходай түземлек бирсен».
Инстачылар да күлмәкнең бик кыска булуын һәм матур да булмавын язган.
«Мин Волгоградта булып кайттым. Андагы татарлар: «Сез бит башкалада яшисез, сез үрнәк күрсәтергә тиеш», - диләр. Бигрәк тә киемнәрегезгә карап исләре китә. Сезнең дә күлмәгегез кыска ич инде. Үзегез сизмәдегезмени соң? Сәхнә өстә, халык аста утыра. Ничек уйлыйсыз, җаный?";
«Күлмәгегезнең арты ярыйсы, алды кыска бит инде»;
«Бигрәк ямьсез, салып ат бу күлмәгеңне», — дип язып калдырганнар виртуаль дуслары.
Гөлназның икенче күлмәген ошатучылар күп, әмма әбисе анысын да ошатмаган.
«Әби белән килешәм. Берсе кыска, икенчесе ачык, әмма икесе дә килешә»;
«Әби әйтсә, чын дөресен өйтә, чөнки ул синең үзеңнең әбиең», - дип язганнар.
«Күпме күз карый бит сезгә. Әбиегезнең балама күз тимәсен дип кенә әйткән сүзе булгандыр! Нинди кием киеп чыксагыз да, сез сәхнәнең бизәге», — дип тынычландырган бер инстачы.