Гөлназ Гафурова кишерне саклау өчен түтәлдә генә калдырырга киңәш итә
Җырчы кышка әзерләнгән байлыгын күрсәтте.
Җырчы Гөлназ Гафурова кышка әзерләгән сый тулы банкалар тезеп куелган базларын күрсәтте һәм яшелчәләрне саклау буенча кайбер киңәшләрен бирде.
"Кишер һәм шалканны бәрәңге кебек таратып сакларга кирәкми. Алар ком белән аралаштырып куйганда яхшы саклана. Кишерне яхшылап юып, киптереп, полиэтилен пакетта да сакларга мөмкин.
Кишернең бер өлешен түтәлдә дә калдырырга була. Барысы да булмаса да, күпчелеге яхшы саклана. Аны язын җирдән туң китүгә казып алырга кирәк, алайса үсә башларга мөмкин. Мондый язгы кишер бик тәмле булачак.
Кәбестәнең тышкы яфракларын алып, стеналарга тиеп тормасын өчен сеткаларга асып куеп, подвалда сакларга була.
Чөгендерне шулай ук ком белән аралаштырып куйсагыз була, ә салкын базда таратып салынган килеш тә саклана. Шулай ук яхшылап юып, киптереп, полиэтилен пакетларда сакларга мөмкин.
Инстачылар да яшелчәләрне саклау буенча үз серләре белән уртаклашкан. Җырчының виртуаль дуслары аның уңганлыгына шаккаткан һәм тозлы кыяр ашарга килергә теләк белдерүче дә табылган.