Гөлназ Асаеваның әниләргә багышланган яңа җыры чыкты

Башкортстан җырчысы Гөлназ Асаеваның яңа җыры «Әнкәй ни хәлдә икән?» дип атала.

«Һәркемнең тормышында иң изге кеше ул — әни. Чын күңелдән безне яратучы бердәнбер кеше дә — әни. Ялгышларыбызны, хаталарыбызны һәрдаим гафу итүче, кичерә белүче иң олы йөрәкле кеше дә — әни. Ничә яшебезгә җитсәк тә, безне сабый бала кебек кайгыртып, безнең өчен ут йотып яшәүче дә — әни», — дип язган яшь җырчы.

Ул җырның авторларына да рәхмәт әйткән һәм тамашачылар яңа җырны яратып тыңлар дип өметләнүе турында да язган.

«Әнкәй ни хәлдә икән?!» җырының авторлары — Варис Акбашев һәм Фирзәр Мортазин.

Яңа җырның сылтамасы җырчының инстаграмдагы сәхифәсендә бар.