Гөлназ Асаева сәхнәгә чыгуы хакында: «Бай-бай абыйлар белән чуалып йөрмим, шөкер»
Продюсер Рамил Айметдиновның «Мактау тактасы» дип аталган сәхифәсендә яшь җырчы Гөлназ Асаева да катнашкан. Инстаграм битенә элгән видеосында ул бер тамашачының: «Әтисе булмаса, Гөлназ сәхнәдә була алмас иде», — дигән сүзләренә җавап бирә.
«Җырчы булам дип, бай-бай абыйлар белән чуалып йөрмим, Аллага шөкер. Әти-әниләрем аркасында сәхнәгә чыктым. Әмма алар минем өчен җырламый, концертлар оештырмый, унбиш яшемнән үз-үземне карыйм, Аллага шөкер. Үз көчең, сәләтең булмаса, хет әллә нинди әниләр булсын…
Әлбәттә, без әти-әниләребездән башка туа алмас идек. Мин мондый сүзләргә горурланып кына әйтәм. Мин әти-әниләрем ярдәме белән чыктым, әлләкемнәр аша йоклап чыкмадым бит! Мин моңа бик шат» — дип сөйли видеода Гөлназ Асаева.
«Ай… Молодец та инде үзең! Дөрес әйтәсең!!! Шундый талантлы, акыллы әти-әниләр белән горурлан, һәм рәхәтләнеп җырла!», «Андый коментарийларны укып, вакытыңны да әрәм итмә.Гомумән, игътибар итмә син аларга. Алар синең тырнагыңа да тормыйлар», «Алай әти-әни аркасында гына бик чыгып булмыйдыр ул, үзеңнең талантың булмаса. Гөлназ, синең беренче җырлаганыңны сигез яшьлек чагыңда ишеткән идем, син бит моң, талант иясе, уңышлар сиңа», — дигән сүзләр язганнар җырчыга.