Гөлназ Асаева челтәрле бизнес продукциясенең рактан һәм ковидтан дәваламавын әйтте
Җырчы «Гадел әңгәмә» тапшыруында халыкны алдап, челтәрле бизнес товарларын сатучы артистлар әйткән сүзләргә ачыклык кертте.
Күптән түгел, челтәрле бизнесларның берсендәге продукция яман шештән һәм ковидтан дәваланырга булыша, дигән сүз чыкты. Үзе челтәрле бизнеста эшләүче җырчы Гөлназ Асаева бу сүзләрне кире какты.
Гөлназ, мин ниндидер бер порошок ракны дәвалый, дисәләр беркайчан да ышанмас идем. Татар эстрадасында «Моны эчсәң ковид, рак бетә, моны куллансаң, гомумән, фәрештәгә әйләнәсең», — дип сатып ятучылар бар. Шушы кешеләр аркасында, намуслы эшмәкәрләргә караш үзгәрә. Син ничек карыйсың моңа?
Әйе, ул ягы бар. Әлбәттә, яхшы карамыйм инде. Икенче яктан уйласаң, һәрберсе ничек эшли ала, шулай эшли инде.
Бу бит кешене алдау.
Кешене алдау дип… Алдау да түгел инде ул. Рактан булыша торган әйбер бездә, гомумән, юк. Әмма химиотерапияне җиңелрәк үткәрә торган әйбер бар. Ә инде рактан дәвалый торган юк.