Гөлназ Асаева: Артистның яңа җырын пабликка куяр өчен «ат хакы» кадәр акча сорыйлар
«Әйтсәм, тагын начар булам инде. Әйтмәсәм, йоклый алмыйм», - дип яза җырчы.
Гөлназ Асаева журналистларның эшчәнлегенә гаҗәпләнүен белдерә. Бу турыда ул инстаграмдагы сәхифәсенә язып куйды.
«Әйтсәм, тагын начар булам инде. Әйтмәсәм, йоклый алмыйм. Бу журналистларга шаклар катам инде. Артист кешенең яңа җыры, яисә яңа клибын пабликларга куярга булса, акча сорыйлар (ат хакы). Үлгәч ике минут саен мәкалә язалар. Нишләп бездә шулайдыр инде ул», — дип уфтана җырчы.
Инстачылар әңгәмә оештырган.
«Бездә бит кешеләрне ике генә тапкыр мактыйлар яки искә алалар: туган көненә һәм үлгән көнендә», «Әйтәм бит, Гөлназыбыз акыллы гына түгел, зирәк дип. Менә кемне куярга иде ул киңәшче итеп, депутат булырга риза булмас инде», «Гөлназ, кичә генә шундый бер аккаунтка бөтен уйлаганымны яздым. Башта безнең видеоларны куеп подписчик җыялар, аккаунтларына хәл кергәч, без үстереп биргән аккаунтны безгә сата башлыйлар», «Аптырама юк өчен», дип Гөлназны хуплыйлар.
«Шулай акча эшлиләр. Сезнең дә ике секундлык рекламагыз 15 мең тора», дип төрттерүче дә бар.
Журналист Нияз Рахман да Гөлназга җавап биргән. «Мин менә 20 ел журналистика тирәсендә эшлим. Бер җырчыдан 1 тиен сораган юк. „Мә“ дип „хоть“ кем тәкъдим итсен. Монда суз аерым пабликлар хакында мөгаен», — дип яза ул.