Гөлара Шәриповадан актуаль шигырь: «Ярты гасыр яшәсәк тә, авыз каплап йөрелмәгән»
Шагыйрә, җырлар авторы Гөлара Шәрипова шигырь юллары белән бүгенге көнне бик дөрес итеп сурәтләп биргән.
Гөлара Шәрипова яңа шигырен инстаграм сәхифәсенә урнаштырган.
Язмыш дибез… күрәчәктер…
Безгә язган киләчәктер…
Уйланырга бер сәбәптер…
дибез дә бит… ләкин йөрәк
акыл белән һич килешми!
Ничек инде яшәп булсын,
Бер күрешми, хәл белешми.
Күңел бераз ял теләсә
Очрашмыйча дуслар белән.
Очар була кайчак күңел
Чит җирләргә кошлар белән.
Читлектәге кош шикелле
Хис итәдер үзен күпләр.
Нигә болай, югыйсә бит
Илләр тыныч, аяз күкләр!
Җанда ләкин тынычлык юк,
Көн тудымы шомлы хәбәр.
Белер идек кадерләрен
Үткәннәргә кайтсак әгәр.
Тыныч рәхәт яшәлгән бит,
Иң мөһиме ирек булган.
Туен иткән, бәйрәмнәрен
Курыкмыйча дус һәм туган.
Бер-береңнән шикләнүләр
Төшләргә дә керелмәгән.
Ярты гасыр яшәсәк тә
Авыз каплап йөрелмәгән…
Кимсетелү, гаеп тагу,
Мәҗбүриләү — йә, бу эшме?
Күнми йөрәк бу хәлләргә,
Өнме соң бу, әллә төшме???
Билгесезлек төпкелендә
Сүнеп бара өмет шәме.
Әйтегезче, бер кайтырмы,
Тыныч тормыш, яшәү яме?
Күпкә китте… сынаулары
Яра салды йөрәкләргә.
Тик Аллаһның хакы бардыр
Язмышларны сирәкләргә…
Кеше кулы уйный калса,
Җавап тотар кылганына.
Килер бер көн, шат яшәрбез,
Шөкер итеп булганына!
Амин!!!