Французча ит (рецепт)
Французча ит ризыгының төрләре күп, һәр хуҗабикәнең үзе сайлаган рецепты бар. Ничек кенә пешерелсә дә, тәмле һәм туклыклы ризык.
800 г сыер ите, 1 кг бәрәңге, 300 г сыр, 3 суган, тәменчә тоз һәм борыч.
Итне зур булмаган телемнәргә кисәргә. Аннан тоз-борыч сибеп, ике ягын да яхшылап төяргә. Каймак салып болгатсагыз, тагын да тәмле булачак.
Табага май салырга, аннары бәрәңгенең яртысын боҗралап турап салырга, тоз сибәргә, өстенә ит кисәкләрен тезеп чыгарга, ярымбоҗралап суган турап салырга, калган бәрәңгене тезәргә кирәк.
Сырны угычтан уарга, майонез һәм каймак салып болгатырга да өстенә җәеп чыгарга.
Мичтә 50 минут пешерергә.
