Франциядә тәртипсезлекләр вакытында түрә өенә һөҗүм иткәннәр, балалары өйдә булган

Франциядә 28 июньнән бирле тәртипсезлекләр дәвам итә. Халык 27 июньдә Парижның Нантер бистәсендә 17 яшьлек яшүсмерне полицейский үтергән аркасында урамга чыкты.

«Интерфакс» язуынча, узган төндә 577 автомобиль һәм 74 бина янган. Юлларда 871 янгын теркәлгән. Полициянең 54 хезмәткәре һәм жандарм яраланган.

Иң куркыныч вакыйгаларның берсе Парижның Л»Аи-ле-Роз бистәсендә булган. Анда машинага ут төркәннәр һәм аны мэр йортына таба этеп җибәргәннәр. Шәһәр башлыгының бер баласы яраланган. Франция полициясе бу хәлне «үтерүгә омтылыш» дип бәяли, тикшерү бара.

2 июльгә каршы төндә ким дигәндә 719 кешене тоткарлаганнар. Полиция хәбәр иткәнчә, алдагы төндә  1311 кешене тоткарлаган булганнар.

Хокук саклау органнары мәгълүматлары буенча, 27 июнь көнне полиция хезмәткәре коралдан атарга мәҗбүр булган яшүсмер юл патруленең туктарга кушкан таләбенә буйсынмаган. Шул сәбәпле полиция аңа ут ачкан. Егет моңа кадәр берничә тапкыр хөкем ителгән булган.