Фирүзә Хафизованың беренче концерты күпмегә төшкән һәм финанс яктан кем булышкан?
Казанда татар эстрадасында 15 ел иҗат итүче Фирүзә Хафизованың беренче концерты узды. Сәхнә артында блогер Олеся Лесная йөргән.
– Борчыласың ахры?
– Бар инде, беренче концерт бит.
– Син эстрадада 15 ел икән, әле генә шундый максатка килеп җиткәнсең. Нишләп моңа шулай соң килдең?
– Беркайчан да соң түгел. Менә хәзер язган. Менә хәзер инде...
– Бу концерт ничә сумга басты? Киемнәр, команда?
– Сиңа дөресен әйтергәме? Киемнәр 150 мең, продакшн 350 мең, ротация 150 мең, реклама 200 мең сум. Менә «чутлап» кара инде...
– Бу бит – миллион сум.
– Аннан артмады микән?
– Менә хәзер артистлар популяр булу өчен пиар ясый. Синең дә шулай ясап карыйсың килмиме?
– Тәрбиям андый түгел бит. Нишләтсәң дә андый юлга бара алмыйм. Минем иҗатка бизнес итеп карамыйм. Ул ягын уйламыйм инде.
– Димәк, синең спонсорың бар. Финанс ягы – иң авыры бит.
– Әйе, бар.
– Ирегез булышамы? Ул – бизнесмен. Нинди бизнес алып бара?
– Сату-алу өлкәсендә.
– Син үзең язган җырларны гына башкарасың. Үз җырларыңны башкаларга бирмисең икән.
– Бирмим, дип әйтү дөрес түгел инде. Бирә дә алам. Минем җырны мин теләгәнчә башкарып бирә алмаслар кебек...