Фирдүс җырлый, Азат, Марат, Ризат котырып бии: артистлар Зинира Рамазанованы котлаган

Җырчы Зинира Рамазанова үзенең 35 яшьлек юбилеен зурдан кубып бәйрәм иткән. Затлы ресторанга үзенең иң якын иҗатташ дусларын чакырган. Җырчының дуслары социаль челтәрләргә куйган сторисларга караганда, юбилей бик шәп узган. Бәйрәмдә җыр-бию, уен-көлке җитәрлек булган.

Бәйрәмне татар эстрадасының төп «зажигалка»сы Фирдүс Тямаев кыздырган.

«Ризат: «Зинира сине көтә, котлап кына кит әле», – дигәч, кереп чыгыйм дип кергән идем. Ә монда никадәр кунак җыелган икән. Әлеге матур гаилә белән бик йөрешмәсәк тә, кайвакыт күрешәбез дә, иң якын кешеләрне күргән кебек аралаша башлыйбыз. Иҗат кешесе гел юлда, күп вакытыбыз юлда үтә. Шуңа да, иң беренче чиратта, сезнең гаиләгездә тынычык булсын, дип телисе килә. Кешенең гаиләсендә тынычлык булмаса, ир – хатыннан, хатын – ирдән уңмаса, тормыш барып чыкмый. Сез – бик матур парлар. Гел шулай матур итеп яшәргә язсын», – дип котлаган Фирдүс сәхнәдәш дустын.

Тямаев туган көндә үзенең хит җырларын да башкарган. Ул җырлаганда, Азат Фазлыев, Ризат Рамазанов һәм Марат Мухин дөньяларын онытып биегән. Кызык видеоларны Маратның хатыны, блогер Гөлия Вәлиәхмәтова күрсәтте.

Зинираны юбилее белән котларга Гүзәл Уразова белән Илдар Хәкимов та килгән. «Бер матур кызны котларга барабыз хәзер. Чәчәкләр әзер», – дип сөйләгән иде Илдар Хәкимов сторисларында. Зинира бәйрәме көнне, чыннан да, кызлар кебек. Образы да яңа – нечкә билләрен күрсәтүче кыска гына кара күлмәк киеп куйган, чәчләрен артка җыйган. Курчак тек курчак инде менә.

Юбилей кунакларын Алсу – Азат Фазлыевлар, Марат Яруллин, Илдус Садыйков, Илдар Ямалиевлар да биеткән. Видеолар түбәндә: