Фирдүс Тямаев машинада барганда хатыны Резедә Әхмәтвәлиева белән әңгәмә корганын видеога төшергән һәм социаль челтәрдәге сәхифәсенә куйган.
– Артист хатыны булу җиңел түгел ул. Авыр бит, әйеме? Ир кеше гел юлда, гел өйдә булмагач...
– Нәрсә дип әйтим? Зарланырга яратмыйм. Түзәрлек, яшәп була. Әлбәттә, авыр. Балалар булмаганда ул яшәргә җиңелрәктер. Хатын – үз эшендә, ир – үзенекендә. Ә балалар белән аз гына авыррак, әмма түзеп була. Артист булмаса бит инде, менә вахталарга китеп эшләүчеләр бар, алар да 1-2 ай читтә эшли. Нишлисең…
– Бөтен рәхәт бергә килми, шулаймы? Нәрсәдер әйбәт булсын өчен, нәрсәдәндер баш тартырга кирәк.
– Дөньяда тотрыклылык булмагач, авыррак. Эш булганда эшлим, дисең. Гел эшләп торгач, сәламәтлек бетә. Тагын авыр адәм баласына.
– Шулай шул. Әле мин гастрольдән кайткач та тик кенә өйдә утырмыйм.
– Артист кеше гастрольдән эмоцияләр белән кайта. Әле аның белән берничә көн яши.
– Синең Резедәң зирәк, дип язалар миңа. Мин җүләр булып чыктым. Син генә акыллы инде. Барысы да шулай яза.
– Мине мактап язгач, син начар дигән сүз түгел бит ул. Син минем турында сөйләгәч, минем хакта язганнар. Аллаһның рәхмәте булсын! Син дә зирәк инде, матурым.