Фирдүс Тямаев социаль челтәрдәге сәхифәсендә үзенә бирелгән файдалы бүләкне күрсәтте. Аңа бер тартма оекбаш бүләк иткәннәр. Араларында милли бизәк төшерелгәне, «Безнең Тямай» дип язылганы һәм кызыклы җөмләләр язылганнары да бар. Аларны Буа районында җитештерәләр икән.
Җырчы бүләкне башта улларына күрсәтә, кече улы «Безнең Тямай» дигән оекбашларны аралый, хатыны да «файдалы бүләк» дип хуплап ала.
«Сабантуй вакытында носкием югалды, дигән идем бит. Иҗатымны яратучылар бер тартма носки бүләк итте. Икенче юлы, трусигымны югалттым, диярмен әле, берәрсе бер тартма трусик алып килмәсме икән… Кемнәр үз туган илен, туган ягын ярата, кемнәр патриот, чит җирдән носки алып йөрмәгез, Буаныкын алыгыз. Кайсыгызга «Тямай» ноские кирәк, бәясен язып җибәрермен», – ди җырчы.
«Безнең Тямай» оекбашын почта аша җибәрүен сорап язучылар да бар.
Фирдүс Тямаев Сабантуйлардан соң носкиен югалтуы, шул сәбәпле хатыны «куып чыгарды» дип шаярткан иде.