Фирдүс Тямаев: «Күлмәк тектергәндә Резидә „артык кыйммәт“ дип экономияли башлый»

«Сәхнәдәге тыйнаклыгы тормышта да чагыла инде аның. Сәхнә күлмәкләре тектергәндә, Резидәм: „кыйммәт“, „кирәкми“ дип, экономияләргә тотына. „Зинһар, бәясен уйлама, тектер генә“, — дим мин аңа. Үзем тегүчеләргә бәясен әйтмәскә кушам», — ди Фирдүс Тямаев хатыны турында. 

Җырчы «Интертат» хәбәрчесенә яңа сезонда хатыны белән дуэтлары күп булачагы турында да сөйләде. 

«Резеда белән дуэтлар әзерлибез. Филармония концертлар залында хатынымның сольный концертын үткәрергә хыялланам. Үзем кысылмыйча, бары тик хатын-кызлар концерты итеп кенә. 

Резидәмнең җырлавын бик яратам. Халык җырларын моңлы башкара, баянга да җырлый. Аның тавышы сихри. Кайвакыт аны баянга җырлатам да, чишмә агышы кебек тавышыннан ләззәт алып утырам. 

Мине халык: «Фирдүс, хатыныңны җырлатмыйсың», — дип гаепли. Киресенчә, Резидәнең сәхнәдә җырлавын мин бик телим. Ул минем кебек сәхнәдә янып тормый, ә тыйнаклыгы белән алдыра. Аллаһка шөкер, үзе сәхнәгә лаеклы чыга. Киенә дә белә, җырлары да әйбәт аның. 

Игътибар иткәнегез булса, мин, Резидәдән кала, бер җырчы белән дә дуэт җырламыйм. Шуның аркасында бер елны «Татар җыры»на да кертелмәдем. Резидә белән дуэтымны чыгарыгыз дип шарт куйган идем. Алар шуны үтәргә теләмәгәч, чакыруларын кире кактым. Миңа гаиләм мөһимрәк. 

Тямаевның хатынын бәйгедә катнаштырмадылар дип үпкәләмәдем мин. Аңлар идем, әгәр Резидә фонограммага җырласа яки аның моңы булмаса. Бар яклап килгән кешене җырлатмаулары кәефемне төшерде. 

Ул бит халык өчен дә яңалык булыр иде. 

Безнең быел иҗат төркемебезгә 10 ел тулды. Шул юбилейга әзерләнеп ятабыз. Резидә белән барлык элекке дуэтларыбызны яңартырга ниятлибез. Әле ике яңа биюче алдым. Хәзер безнең төркемдә, хатынымны да санап, 17-18 кеше», — дип сөйләде Фирдүс «Интертат”ка.