Фирдүс Тямаев хайван тоягы эзенә җыелган суны эчкән
Җырчы балачак хатирәләрен исенә төшергән.
Автор-башкаручы Фирдүс Тямаев җыелган суда итеген юганын видеога төшергән. Видео янына «эх, балачак», дип язган.
«Кечкенә вакытта әни белән чөгендер эшкәртергә йөри идек. Бервакыт су бетте, шундый кызу. Мине суга җибәрделәр. Көтү йөргән урынга җиттем, сыер тояклары эзенә су җыелган. Шунда футболканы салып, суга төшереп, ягъни суны сөзеп эчә идек», — дип искә ала ул җыелган суны ерып.
Җырчыга кушылып, инстачылар да хатирәләргә бирелгән:
«Шулай шул, чөгендер чүбе дә утадык, елгадан су да эчтек, пычракта батып йөрдек. Авыл балалары бит без, бәхетле балалар!»;
«Шулай юа идек итекне. Итек кадерле иде. Чиста итеп салып, кулга тотып, тигез итеп тезеп куя идек. Кайвакыт алыштырып та китәләр иде»;
«Без дә шулай юдык, басуда чөгендер үскәч, кайсының эченә яңгыр суы җыела иде, аны да эчә идек, елгадан да эчтек. Рәхәт балачак безнең.
«Әй, бар иде шул андый чаклар, печән чапканда су бетеп китсә, ат арбасы эзе дисеңме, трактор узган юлмы, урманда кайда су күрсәк, баштагы яулыкны сала идек тә су өстенә шуны салып, ятып эчә идек. Без шуңа таза-саудыр инде».
«Элек шундый су эчтек. Хәзер кран суы да ярамый», — дип язган берәү.