Фирдүс Тямаев хатынының туган көненә бер чиләк йомырка бүләк иткән
«Резеда урынында башка берәү чиләкне йомыркасы белән бергә башыңа кидерер иде», — дип яза инстачылар.
Фирдүс Тямаев хатыны Резеданы туган көнендә бик үзенчәлекле бүләк белән сөендергән. Җырчы хатынына бер чиләк авыл йомыркасы алып кайткан. «Безнең өйдә беркайчан да йомырка бетмәсен», — дип тели Фирдүс. Иренең шаяртуларына ияләнеп беткән Резеда бүләкне көлә-көлә, рәхмәтләр укып ала.
Инстачылар җырчының инстаграмдагы шаян видеосын җитди кабул иткәннәр. Алар Фирдүснең Резедага чәчәк бәйләме алып кайтмавына аптырый. «Фирдүс чәчәкне көн дә бирәдер ул концерттан соң, ә йомырка көн дә булмый», — дип яза берсе. «Дөрес, бигрәк тә авылныкы», — дип җавап кайтарган аңа җырчы.
«Әйтмә, чәчәкне ашап булмый. Йомырка белән тамак тук. Йомырка гына димә, бәясе йөз сумга менде инде», — дип җөпләгән икенчесе. «Чынлап та яраткан хатын гына мондый бүләккә сөенә ала. Аның урынында башка берәү чиләкне йомыркасы белән бергә башыңа кидерер иде», — дип тә язганнар.