Фирүзә Парижның улының Казанда яшьләрнең үз телендә сөйләшүенә исе киткән
Җырчының улы Татарстанга барып кайтканнан соң, башкорт теленә карата фикерен үзгәрткән.
Башкортстанның атказанган артисты, җырчы Фирүзә Париж башкорт теле көне уңаеннан инстаграмга пост язган.
«Быел улым башкорт теленә, халкыбыз язмышына төплерәк карый башлады. Шуңа бигрәк шатмын. Чөнки бервакыт: «Миңа башкорт теле кирәкми», - дигәнрәк фикердә иде. Апасына Казанга барып кайткач, анда кибетләрдә, урамда яшь кешеләрнең үз телендә сөйләшүенә исе китеп кайтты. «Ә нишләп бездә дә шулай иркен итеп башкортча сөйләшмиләр ул, әнкәй?» — диде. Һәм телгә карата фикере нык үзгәрде.
Балаларыбызның, булачак оныкларыбызның башкорт телендә сөйләшүен, халык җырларын белүен теләр идем. Һәм шуның өчен тырышам да. Кайда гына булсаң да, үз телеңне белү — ул горурлык һәм мәдәнилек дип саныйм», — дип яза җырчы.
