Җырчылар сәхнәдә чыгыш ясаган вакытта онытылып, җырга кереп китәләр дип уйлаган идегезме? Юк икән шул. Бөтен дөреслекне Филүс Каһиров ачып салды. Социаль челтәрдәге шаян видеосында җырчы сәхнәгә чыгып басуга ниләр турында уйлавын әйткән.
«Концертта җырлаган вакытта минем уйлар:
Киләсе куплетта нинди сүзләр әле?
Залда ничә кеше икән?
Үтүкне сүндердемме?
Тямайга ничә яшь ул?
Балалар өйдә нихәл микән?
Гитараның тавышы җитми ахры...
Бөтен әти-әниләр дә «Синий трактор» җырын яттан беләме икән?»
Иң беренче комментарийны Фирдүс Тямаев язган. «Мин причем монда?» – дигән ул аптырап һәм рәхәтләнеп көлеп.
«Белмим, кайчагында шулай уйлап куям», – дип язган аңа Филүс.
Үзе дә ике малай әтисе, җырчы Илгиз Шәйхразиев: «Праппалям, паппалям», – дип башлаган «Синий трактор» җырын нәкъ балалар телендәгечә.
«Синий трактор едет к нам», – дип дәвам иткән Филүс.
«Посмотрите на него, кто же там поет? Киек каз юллары», – дип уенга кушылган Илгиз Хисамов.
«Бу кадәр уйлар белән сәхнәгә ник чыкканыңны онытырсын», – дип тә комментарий язган бер виртуаль дусты.
«Шаярам гына. Чыгыш ясаганда бары тик моңга тулып җырлыйм, хисләрем турында уйлыйм», – дип тынычландырган Филүс барысын да.