Татарстанның һәм Башкортстанның атказанган артисты Филүс Каһировны Чаллыга «Шәһри Чаллы»дан – пятачок» тамашасына чакырганнар. Газета редакциясе тарихында мондый зур концерт беренче тапкыр уздырылган.
«Машина йөртүчебез Зөлфәт абый Казаннан барып алды аны. Артистлар бүлмәсенә елмаеп килеп керде ул. Өстәл артында кызык-мәзәк хәлләр сөйләп көлдереп бетерде. Салаватча сөйләшеп шаккатырды. Гомумән, синең үзеңә үк син булып күрсәтергә мөмкин.
Ул «Киек каз юлы», «Кайда син?», «Җиз кыңгырау моңнары», «Биеп ал» җырларын башкарды. Соңгысында зал биергә кузгалды. Филүс үзе дә оста биюче, хәрәкәтләренә күз дә иярми.
Аннары әйберләрен тиз-тиз тутырды да кайтып китте. Соңыннан кызлар белән бүлмә җыештырганда белдек, «косметичкасын» онытып калдырган. Берәрсе артыннан җибәрербез, дип хәбәр иттек. Ә без моны үзебезчә юрадык – әйбере калган икән, димәк, «пятачок»ка әйләнеп кайтачак әле ул», – дип яза «Шәһри Чаллы» газетасы.