Филүс Каһировның улы:«Әника әтика белән бер-берегезне яратасызмы?»
Җырчының хатыны Эльмира Каһирова олы улларының «әника» һәм «әтика» дип йөрүен әйткән.
«Олы улыбыз Айдар белән кызыклы сөйләшү булды», — дип язган Филүс Каһировның хатыны Эльмира һәм әңгәмәне инстадусларына тәкъдим иткән.
«Айдар: Әника әтика белән бер-берегезне яратасызмы?
Мин: Әлбәттә, улым! Бик яратабыз.
Айдар: Ә сез башка талашмыйсызмы?
Мин: Әлбәттә, улым. Без талашмаска бик тырышачакбыз.
Айдар: Сез ешрак үбешегез, кочаклашыгыз.
Мин: Яхшы, улым. Мин сине ишеттем. Шулай эшләрбез дә.
Айдар: Әгәр сез әрләшсәгез, мин дә сезне әрләячәкмен.
Мин: Яхшы, Айдар! Андый вакытта син безгә «җитте әрләшмәгез», дип әйт.
Айдар: Яхшы, әника! Тик мин ике тапкыр кабатламаячакмын!
Сезнең балаларыгыз белән нинди кызыклы сөйләшүләр булганы бар?» — дип сораган Эльмира Каһирова.
Эльмираның виртуаль дуслары баланың акыллы сүзләр сөйләвенә шаккаткан.
«Бала теле белән… Нинди акыллы! Безнең болай әйтергә төшебезгә дә керми. «Ешрак үбешегез», дип дөрес әйтә бит»;
«Шәп әйткән»;
«Ә безнең әти-әнигә шулай дип әйтергә баш эшләми инде. без бит ХХ гасыр балалары…» — дип комментарий калдырган алар.
Каһировлар гаиләсенә соклануларын белдереп язучылар да бар:
«Сез бик матур гаилә!», «Пар килгәнсез!».
«Мин сезне әрләшмисез дип уйлый идем», - дип язган Эльмираның бер виртуаль дусты.
«Мин дә башкалар турында шулай уйлыйм. Әмма андый кешеләр юктыр ул», - дип җавап биргән җырчының хатыны һәм үзе дә «Филүс, башка әрләшмибез», дип комментарий калдырган.
Бер ханым бала белән кызык сөйләшү турында язган:
«Зур әни (әби) ник карт» дип сораган нәни туганыма, ул күптән туган дип җавап биргәннәр. Бу сөйләшүдән соң ул әбинең җыерчыкларын караштырып, «зур әни, син бик күптәнге хатын» дигән».