Федераль трассада өч машина тимер өеменә әверелгән авариядә өч кеше һәлак булган - видео

4 октябрьдә иртәнге ун тирәсендә Мәскәү-Архангельск трассасының 518нче километрында юл һәлакәте булган. Бу турыда Россия Эчке эшләр министрлыгының Вологда өлкәсе буенча идарәсе  хәбәр итте.

ВАЗ 2110 машинасы каршы як полосага чыккан һәм «Фольксваген Транспортер» микроавтобусына бәрелгән. Микроавтобус исә шул ук юнәлештә баручы «Фольксваген Тигуан» кроссоверына килеп кергән.

«Фольксваген Транспортер» белән 35 яшьлек ир-ат, «Фольксваген Тигуан» белән 48 яшьлек хатын-кыз идарә иткән.

Әлеге юл һәлакәтендә өч кеше үлгән. ВАЗ машинасын йөртүче 28 яшьлек ир-ат, «Фольксваген Транспортер» микроавтобусында баручы ике пассажир — 69 яшьлек хатын-кыз һәм 49 яшьлек ир-ат урында ук җан биргән.

Тагын биш кеше имгәнгән. Шул исәптән «Фольксваген Транспортер» йөртүчесен төрле травмалар белән хастаханәгә китергәннәр.