Түбән Камада яшәүче хатын бергә яши торган ирен чәнчеп үтергән. Ир фатирга балкон аша кергән булган. Бу турыда Россия Тикшерү комитетының Татарстан буенча Тикшерү идарәсенә сылтама белән «Татарстан 24» каналы хәбәр итте.
40 яшьлек хатынга карата «үтерү» маддәсе буенча гаепләү белдергәннәр.
Тикшерү версиясе буенча, 9 июльдә бу хатын белән яши торган 46 яшьлек ир-ат өйгә исереп кайта. Хатын үзе дә исерек була, ул ирен өйгә кертми. Шуннан соң ир тәрәзәне чүкеч белән вата һәм балконнан өйгә керә.
Ир белән хатын талаша башлый, хатын пычак ала һәм ирнең күкрәгенә берничә тапкыр кадый. Ир урында ук үлә.
Аннары хатын ярдәмгә күршесен чакыра, күрше ир-ат полициягә хәбәр итә.
Әлеге хатын моңа кадәр дә сәламәтлеккә зыян салган өчен җаваплылыкка тартылган булган. Ул хәзер күрсәтмә бирүдән баш тарта, аны сак астына алганнар. Тикшерү бара, диелә хәбәрдә.