Г.Камал исемендәге Татар дәүләт академия театры актеры Фәнис Җиһанша мошенниклар һөҗүменә дучар булган. Алар аннан 2 мең сум акча сорап, үзе турындагы шәхси мәгълүматларны интернетка чыгару белән куркытканнар.
«Төн уртасында хат килеп төште. «Сезнең почтаны, исем-фамилиягез, яшәү урыныгыз һәм паспорт мәгълүматларыгызны җибәреп, сезнең банк мәгълүматларыгызны сатуымны сораган кешенең кем икәнлеген әйтә алам. Чөнки ул миңа, алдан килешкәнчә, акча күчермәде. 2 мең сумга аның кем булуы турында белешмә җибәрә алам», – диелгән. Мондый хәлдә нишләргә кирәк, кем белә?
«Дәвамы да килде», – дип яза артист.
«Иртәнгә кадәр көтәм дә, сезнең турыдагы мәгълүматларны төрле форумнарга таратам, сезнең исем-фамилия белән социаль челтәрләрдә сәхифәләр ясыйм», – дип янаган мошенниклар актерга.
«Беренчедән, гомумән җавап бирмәскә һәм әңгәмәгә кермәскә. Полициягә шалтыратырга була. Ул – аларның эше»;
«Ышанмагыз, бернинди акча күчермәгез. Алдау һәм ялган»;
«Нәрсә генә уйлап чыгармыйлар, вәт фантазия бу мошенникларда»;
«Мошенниклар акча эшләүнең төрле юлларын уйлап таба. Бөтен кешегә рәттән җибәрәләр. Бернинди серләрегезне белә торган кеше дә юк», – дип киңәшләр бирәләр артистка. «Мин дә шулай дип уйлыйм, рәхмәт», – дигән үзенә җавап язучыларга Фәнис Җиһанша.