Этләр ни өчен койрык болгый?

Койрыгын болгаучы эт чыннан да сөенеп йөриме, әллә моның башка сәбәбе бармы? Фактлар сайтында шул хакта аңлатма бирелә.

Койрыгын болгаучы эт сурәтләнгән видеоны акрынайтып карасаң, койрыкның бер якка күбрәк чайкалуы күренә икән. Италия тикшеренүчеләре ачыклаганча, хуҗасы яки иптәшләре белән очрашканда койрыкны уң якка болгау уңай хисләрне белдерә. Койрыкны сул якка таба болгау куркыныч барын, тынычсызлыкны аңлата.

Бу аерымлык этнең баш миенең уң һәм сул як ярымшарының үзенчәлекләре белән аңлатыла. Этләр сөйләшә белмәсә дә, кәефен күрсәтә ала.

Эт койрыгының өске ягында, тамыры янындарак миләүшәсыман биз (миләүшә чәчәк формасында булганга шулай атала) бар. Бу биз бүлеп чыгара торган сыеклык бер төрдәге этләрне, шулай ук аерым этләрне танырга ярдәм итә.

Койрыгын күтәреп болгап, эт үзенең исен ныклап тарата, шулай итеп ул «диалог» башлый.

Агрессия яки һөҗүм итү вакытында эт койрыгын болгамый, ә өскә күтәреп куя.

Эт курыкса яки сак булса, ул койрыгын корсагына ныклап кысарга һәм үз исен яшерергә тырыша, диелә хәбәрдә.