Этләр белән үскән ишәк үзен эт дип хис итә башлаган — видео

Англиядә бер гаиләдә яшәүче ишәк үзен эт дип белә. Аның хуҗалары шулай дип уйлый. Ишәк урамда йөрергә, туп белән уйнарга, диванда ятарга ярата. Бу турыда Daily Mail басмасына сылтама белән «Газета.ру» хәбәр итте.

Ишәккә өч ай булганда, аны анасы ташлый. Кай исемле бу ишәкне 64 яшьлек Джон Натолл тәрбиягә ала.

«Былтыр аны ана ишәк тудырды, ләкин ана баласыннан баш тартты», — ди ир-ат.

Шуннан соң ул ишәкне өйгә алып кайта, ашата, аякка бастыра. Джонның берничә эте дә бар. Ишәк шулар белән бергә үсә.

Джон сүзләренчә, Кай хәзер үзен эт дип саный. Ул ишәкнең сәерлегенә борчылмый, киресенчә, аларга кызык икән.

Мин юлдан барганда, ишәк янымнан эт кебек йөгереп бара, ди ул.

Натолл киләчәктә Кай фермадагы башка ишәкләр янында яши башлар дип уйлый. Аның фермасында 70 ишәк бар.

«Иң мөһиме — ул исән калды. Миңа аның гомерен саклап калырга кирәк иде», — ди Джон.