Эт баланың бөерен тешләп алган, кабыргаларын, умырткалыгын сындырган, эчәклеген яралаган

Рязань табиблары эт талаган 4 яшьлек кыз баланы коткарган. Бу турыда төбәк Сәламәтлек саклау министрлыгына сылтама белән «Вести» каналы хәбәр итте.

Эт баланың бөерен тешләп алган, башка органнарына зыян китергән.

Кыз хастаханәдә 1 айдан артык ята. Фаҗига җәй көне була. Хастаханәгә китергәндә, бала шок халәтендә була.

«Травмалары бик катлаулы: уң бөере кан тамырларыннан һәм бәвел каналыннан тешләп алынган, уникеилле эчәклегенә зыян килгән, ике плевраль куышлыгына да зыян килгән, берничә кабыргасы һәм умырткалыгы сынган, гәүдәсе һәм аяк-кулларында тешләнгән урыннар күп», – дигәннәр ведомствода.

Балага операцияне берничә сәгать ясыйлар. Табиблар зыян килгән органны ала, кан тамырларын, бәвел каналын, уникеилле эчәклек яраларын тегә. Хәзер баланы өенә чыгарырга әзерләнәләр, диелә хәбәрдә.