Эшне «Әгузү билләһи мин әш-шәйтани-р-раҗим» дип башлау дөресме?
Эш башлаганда истигазадан түгел, бисмилләһтән башлау хәерлерәк.
Татарстан мөселманнары Диния нәзарәте фәтваларында «Әгузү билләһи мин әш-шәйтани-р-раҗим» (истигаза) гыйбарәсе турында аңлатма китерелгән.
Әссәламү галәйкүм! «Әгузү билләһи мин әш-шәйтани-р-раҗим» сүзләрен Коръән укый башлаганда гына кулланасы, ә башка эшне башлаганда кулланмасаң да була, дип ишеткәнем бар. Дөрес фикерне ишетәсе иде.
Үә галәйкүм әссәлам! Әйе, мәҗлесләр әдәбе буенча «әгузү билләһи мин әш-шәйтани-р-раҗим» сүзләрен кулланмасаң да ярый. Бу сүзләр Коръән укуны башлаган вакытта кулланыла. Бу турыда «Фәтава әл-Хиндия» китабында китерелә:
«Әгәр кеше берәр эш башларга җыенса, аңа истигаза әйтү кирәкми, ә Коръән укырга ниятләсә, истигаза әйтү тиешле була». Бу турыда «Фәтава әс-Сираҗия» хезмәтендә дә язылган.
Шулай итеп, эш башлаганда истигазадан түгел, бисмилләһтән башлау хәерлерәк.
Ә Аллаһ яхшырак белүче! - диелә җавапта.