Җәйге-көзге чорда Татарстан Республикасында энтеровирус инфекцияләре таралу куркынычы арта, бигрәк тә балалар арасында. Авыру турында «Зәй район үзәк хастаханәсе» табиб-эпидемиологы Резеда Абзалова сөйләгән. Татарстан Сәламәтлек саклау министрлыгы матбугат хезмәте шул хакта яза.
Энтеровирус инфекциясе (ЭВИ) — эчәклек РНК-вируслары китереп чыгара торган кискен авырулар төркеме. Авыруны кузгатучылар ашказаны-эчәклек трактына гына түгел, нерв системасына, тирегә, мускулларга һәм лайлалы тышчаларга да зарар китерә ала.
Инфекциянең чыганагы - авыру кеше яки симптомсыз йөртүче. Авыру йогуының төп юллары — фекаль-ораль (пычранган куллар, су, продуктлар һәм көнкүреш әйберләре аша) һәм һава-тамчы юлы. Иң күп авырулар җәйге-көзге чорда теркәлә, ешрак 3 яшьтән 10 яшькә кадәрге балалар арасында.
Клиник билгеләре төрле: эчәклек тайпылышларыннан һәм кискен респиратор вирус инфекциясе симптомнарыннан алып герпес, ангина, энтеровирус экзантемасы («кул-аяк-авыз»), серозлы менингит һәм органнар һәм системаларның башка зарарланулары кебек үзенчәлекле формаларга кадәр. Авыру, кагыйдә буларак, температура күтәрелүдән, хәлсезлектән, күңел болганудан һәм косудан башлана.
Энтеровирус инфекциясен үзенчәлекле дәвалау юк. Терапия симптоматик характерда була һәм күп эчүне, температураны төшерүче чараларны, ятып тору режимын һәм йомшак ризыклар ашау диетасын үз эченә ала. Каты авыру вакытта госпитализация таләп ителә, диелә хәбәрдә.