Энесен коткарган 15 яшьлек малайны аю ботарлап үтергән
Авылдан алты километр читкә чыгып киткән 13 һәм 15 яшьлек ике туганга аю һөҗүм иткән.
Камчаткада 15 яшьлек үсмер малай 13 яшьлек энесен аюдан коткарган. Ләкин ул үзе һәлак булган. Бу турыда РЕН ТВ хәбәр итте.
Малайлар авылдан алты километр читтә йөргән. Шул вакытта балаларга аю һөҗүм итә. Башта ерткыч 13 яшьлек баланы ботарламакчы була. Балаларның олырагы аюның игътибарын үзенә юнәлтә. Шул вакытта энесе качып өлгерә.
15 яшьлек бала үзе ерткыч тырнагында һәлак була. Аның ботарланган мәетен аю һөҗүм иткән урыннан бераз читтәрәк тапканнар.
Фаҗигадән соң аучылар бу аюны эзәрлекли. Аны табалар һәм атып үтерәләр.
Әлеге вакыйга буенча тикшерүчеләр эш башлаган. Балаларның авылдан шулай еракта, олылардан башка нишләп йөргәнен ачыклыйлар, диелгән әлеге хәбәрдә.
