Эльвира Хамматованың чемоданында ниләр бар?
Җырчының кечкенә чемаданына сәхнә костюмнарына хәтле сыйган.
Җырчы Эльвира Хамматова үзенең гастрольләргә йөри торган чемоданы эчендә ниләр булуын күрсәтте. Видоязманы ул инстаграм сәхифәсенә урнаштырган.
«Сез һәрвакыт: „Чемоданыгызны үзегездән калдырмыйсыз. Аның эчендә нәрсәләр йөртәсез?“ — дип еш кызыксынасыз. Минем ике чемоданым бар. Монысын күбрәк яратам, чөнки аңа күбрәк әйбер сыя. Артист халкы чемоданның һәр почмагы да тулы булсын, әйберләр урынны күп алмасын дип кайгырта», — ди Эльвира.
Җырчының чемоданыннан бизәнү әйберләре салынган косметичка, юеш салфетка, антистатик, хушбуй, тән өчен крем, носкилар, үтүк, туфли һәм ике сәхнә күлмәге чыккан.
Гадәттә, Эльвира үзе белән өйдә кия торган тапочкилар да йөртә икән, бу юлы онытып калдырган. «Алары сәхнә артында өйдәге кебек атмосфера тудырырга ярдәм итә. Ә монда минем күлмәкләрем. Сез сәхнә костмнарын артистлар бик кадерләп кенә йөртәләр дип уйлыйсыздыр инде. Юк, мин бөгәрләнми торган күлмәкләр тектерергә яратам. Аларны һәрвакыт чемоданның икенче бүлегенә төреп салам. Минем бөтен күлмәкләрем дә формаларына тиз кире кайталар. Менә шулай матурланып, сезнең алга чыгабыз», — дип сөйләгән җырчы видеода.