Эльвира Фазлыева мәрхүмә кызының туган көнендә: «Икенче дөньяда мин сине саклармын...»
Алып баручы Эльвира Фазлыеваның фаҗигале төстә һәлак булган кызы Аида 3 ноябрьдә үзенең 8 яшен бәйрәм иткән булыр иде… Эльвираның сторисларында кызының кечкенә вакыттагы туган көне һәм быел җәй уздырган «Аида көне»нең видеолары белән уртаклаша. Шулай ук Эльвира, елдагыча, кызының туган көнендә тәм-томнар, бүләкләр алып барып, балалар йортында тәрбияләнүче ятим балаларны сөендергән.
«Бүген Аидама 8 яшь тулар иде. Әмма минем яраткан кызыма һәрвакыт 4 яшь булачак…
Тормышымдагы иң кадерле кешене югалту хәсрәтенең беркайчан да үтмәячәге белән мин килештем инде… Әле дә бу авырту белән яшәргә өйрәнәм.
Бүген балалар йортында бәйрәм оештырдым. Аида, син хәзер минем кулларым аша әти-әнисез калган балаларга ярдәм итәсең.
Кызым, алга таба яшәргә тырышканымны күрәсеңдер. Синең белән кабат очрашуны ничек көткәнемне дә беләсең.
Туган көнең белән, кечкенә кызым. Мин сине яратам һәм һәрвакыт яратачакмын. Без синең белән һичшиксез очрашачакбыз. Икенче дөньяда мин сине мәктәпкә әзерләп, чәчләреңне тарап үрермен, сиңа иң матур күлмәкләр сатып алырмын һәм кысып-кысып кочаклап, сине саклармын», – дип яза Эльвира…
