Эльмира Сөләйманова моннан бер ел элек: «Минем балаларымны кем карый? Аллама тапшырдым»
Мәрхүм җырчы Эльмира Сөләйманова моннан 1 ел чамасы элек – 2021 елның ноябрендә социаль челтәрдәге сәхифәсендә бер посты астында бүген йөрәккә тиярдәй сүзләр язган булган.
Ул вакытта коронавирус чиренең чираттагы (ничәнчедер дулкын) чәчәк аткан мәле, «куаркод» дигән төшенчәләр барлыкка килгән чор. Җырчы шушы вазгыятькә карата аптырап, виртуаль дусларыннан киңәш сораган.
«Менә шуны уйлап утырам... Прививка ясатыргамы-юкмы?.. Кайсысын ясарга?.. Прививка ясагач, исән-сау калачагыма «гарантия» бармы? Әгәр дә юк икән?.. Минем балаларымны кем карый? Шул «куаркод» булмагач, эшсез өйдә утырам. Нишләргә миңа? Кайсын ясатырга???» – дип язган булган җырчы. Билгеле, ул вакытта аңа бик күп киңәшләр язган виртуаль дуслары. Хәзер анысы мөһим түгел...
«Ишеттем. Укыдым. Аллам күпме язган – шул булачак. Аллама тапшырдым...» – дип йомгаклаган булган сүзен Эльмира... Эх…
Фото: Җырчының социаль челтәрдәге аккаунтыннан