Татарстанның халык артисты Эльмира Кәлимуллина Әниләр көне уңаеннан шәхси сәхифәсенә бик хисле видео урнаштырды. Анда аның улы Мурад шагыйрь Роберт Миңнуллинның «Әни кирәк» шигырен укый. Видеода Эльмира үзе, улы Мурад һәм әнисе катнашкан матур гаилә кадрлары да күрсәтелгән.
«Мурад шигырьне бераз үзгәртте, шулай да сезгә ошар дип өметләнәм», – дип язган җырчы.
Язылучылар Мурадның шигырь укуына гына түгел, аеруча аның чип-чиста татар телендә сөйләшүенә соклана.
«Җанга рәхәтлек бирә»; «Инде шигырьләр укый белә!»; «Ничек матур сөйләшә», – дигән комментарийлар калдырганнар.