Эльмира Кәлимуллина ире турында: «Бала белән бик ярдәм итә, памперсын алыштыра, юындыра»

«Беренче канал»да «Голос» тамашасы финалисты, Татарстанның атказанган җырчысы Эльмира Кәлимуллина ире турында сөйләде. Ул «ТМТВ» каналына «Сөйләшергә кирәк» тапшыруына чакырылган булган.

«Без сине, хатын-кыз буларак, бик бәхетле дип беләбез», – дип сүз башлады тапшыруны алып баручы Лилия Кадыйрова.

«Мин аны бик яратам, ул да мине бик ярата. Без – иҗади кешеләр, ул үзе хореограф-куючы, ул җырчы да. Ул миңа җырлар яза. Ул миңа бик ярдәм итә. Бөтен афишалардагы минем сурәтләремне ул төшерде.

Бала белән дә бик ярдәм итә. Памперсын алыштырырга, юындырырга, ашарга пешерергә, каядыр барырга. Бөтенесе белән миңа терәк. Мине бик ярата һәм бик хөрмәт итә. Мин дә аны шулай ук», – дип сөйләде җырчы.