Татарстанның халык артисты Эльмира Кәлимуллина иҗатташ дусты Эльмир Низамов белән Чукотка якларына гастрольләр белән килгәннәр.
«Шәһәр буйлап аз гына йөрмәкче булып чыккан идек. Бу – үзәк, диделәр. Анадырь – безнең илнең иң көнчыгыш шәһәре. Алга таба инде бер шәһәр дә юк. Бары тик диңгез һәм океан гына», – ди Эльмир Низамов.
«Чукотканың бер үзенчәлеге бар. Бер утрау – АКШка, бер утрау – Россиягә карый. Алар арасында вакыт аермасы 24 сәгать», – дип кушыла аңа Эльмира.
Ләкин ике дусны иң гаҗәпкә калдырганы – кибетләрдәге бәяләр булган.
«Игътибар, бәяләр», – дип яза Эльмира Кәлимуллина, видеолар куеп. Россиянең иң кыйммәтле төбәге саналучы Чукоткада мандаринның килосы – 1300 сум, яшел борыч – 2550 сум, редис – 1250 сум, ташкабак – 1500 сум, баклажан – 1350 сум, помидор – 1550 сум, кыяр – 715 сум тора икән.