Эльмира Гыйльфанованы авырлы килеш сәхнәгә чыкканга оялтмакчы булганнар

Җырчы үзенә килгән сорауларның берсен дә яшереп калдырмаган, уңайсызрак булганнарына да җавабын тапкан.

Эльмираны тамашачы күбрәк ире Рафил Җәләлиев белән парлы җырчылар буларак кабул итә. Инстаграм дуслары да әлеге матур парның инде күпме бергә булулары белән кызыксынган.

«Без Рафил белән 4,5 ел бергә. Институтта укыганда танышкан идек, бүген дә иҗат юлыбызны бергә дәвам итәбез», — дигән җырчы.

Эльмира белән Рафилнең тиздән әти-әни булачагы турында язган идек. Бер инстаграм дусты Эльмирага шушы турыда: «Корсаклы килеш чыгыш ясарга оялмыйсыңмы? Азрак көтеп торырга ярамыймы аны?» — дип тупас сорау бирүдән тайчынмаган. Эльмира да югалып калмаган: «Ә сезгә болай дип сорарга оят түгелме?» - дип соравына сорау белән җавап кайтарган. Үзен гаепләп сөйләүчеләргә җырчының инде исе китми икән. «Аларга да акыл керер әле. Исән-сау булсыннар», — дип язган.

Инстаграм дуслары Эльмирадан авырлы вакытта халык арасында йөри торган төрле ырымнарга ничек каравы турында да сораганнар. «Ышанам дип тә, ышанмыйм дип тә әйтә алмыйм. Әмма әниләр әйткән колакка керә. Чәчемне соңгы тапкыр августа кистергән идем», — дип язган Эльмира.