Эльмира Гыйльфанова: «Кеше бакчага эләгә алмый, ә без бирелгән бакчадан баш тарттык»

Җырчы Эльмира һәм Рафил Җәләлиевларның кызлары Хәяткә 3 яшь тулган. Сабыйның балалар бакчасына йөри башлар вакыты да җиткән. Җәләлиевлар өчен, гел татарча гына аралашкан, татар мохитендә тәрбияләнүче Хәятнең нәкъ менә татар балалар бакчасына йөрүе бик мөһим. Шуңа күрә аларга, алданрак бирелгән бакчадан баш тартып, татар телле бакчага урын булганын көтәргә туры килгән. Бу хакта Эльмира Җәләлиева Телеграм-каналында сөйләде.

«Безнең торак комплексында 3 балалар бакчасы бар. Шуның берсе генә татар балалар бакчасы. Без эләккәне татар булмады. Бик озак уйландык, борчылдык.

Әлегә Хәят рус телен бөтенләй дә белми диярлек. Татарча ачылган телен бозасы да килми бит. Администрациягә барып, бу бакчадан баш тартып, үзебез теләгәненә гариза язып кайттык. Күз алдына китерәсезме – кеше бакчага эләгә алмый, ә без бирелгән бакчадан баш тарттык.

Көтәсегез була, диделәр. Әллә була, әллә юк. Бакчасыз калсак, калабыз инде, дидек тә кайтып киттек. Атна саен шалтыратып сорап тордык. 2 ай үткәч кенә уңай хәбәр әйттеләр. Бик сөендек.

Аллаһы боерса, Хәят тиздән бакчага йөри башлар, дигән өметтә. Ә менә ничек йөреп китүе, ияләшүе – икенче мәсьәлә.

Русчасын вакыты җиткәч үзе өйрәнер әле. «Алиса, включи Эльмира Гильфанова», – дип әйтә белгәч, булган инде», – дип сөйләде җырчы бакча маҗараларын.