Елга аша чыгып барганда трактор һәм аны йөртүче ир-ат су астына киткән
Тракторчы котылу өчен тырышу урынына, тракторны ныграк боз өстенә алып китү өчен газга баса.
Свердловск өлкәсендә трактор һәм аның 53 яшьлек йөртүчесе суга баткан. Хәзер ир-атның мәетен эзлиләр. Бу турыда Свердловск өлкәсе буенча Эчке эшләр министрлыгына сылтама белән «Вести» каналы хәбәр итте.
Трактор 19 февральдә Ница һәм Арай елгалары кушылган урында суга төшеп китә. Фаҗига Ирбит шәһәрендә була. Ул Екатеринбургтан 200 км ераклыкта урнашкан.
«Т-40» тракторына металл конструкцияләр төягәннәр һәм боз өстеннән елга аша чыкмакчы булганнар. Бер мизгелдә боз авырлыкка чыдамый һәм ярыла.
Шаһитлар сүзләренчә, тракторчы салоннан төшеп качу урынына, газга баса, ул ныграк боз өстенә барып җитмәкче була. Шаһитлар ярдәмгә УАЗ машинасы чакыра, тик ул килеп җиткәндә, трактор тулысынча су астына киткән була инде.
Хәзер трактор бик зур тирәнлектә су төбендә ята. Тракторчының мәетен коткаручылар һәм водолазлар эзли. Биредә су агымы көчле булу сәбәпле, эшләр кыенлаша, диелә хәбәрдә.