Элекке салым инспекторы, депутат Хайровның кызы актер Том Круз белән йөри, дип язганнар

Элек Татарстанның салым инспекторы, аннары Дәүләт Думасы депутаты булган Ринат Хайровның кызы –36 яшьлек Эльсина Хайрова Голливуд актеры Том Круз белән очрашып йөри, дип язган Британиянең Daily Mail басмасы.

Газета язуынча, 36 яшьлек Эльсина Лондондагы бер кичәдә төн буе 61 яшьлек актер Том Круз белән бергә биегән, һәм таң алдыннан алар бергә китеп барганнар. Ринат Хайров РИА Новостига моның дөрес булмавын әйткән. Ул моны»акча түләп язылган пычрак» булуын, «полная чушь» булуын әйткән. «Мэш» каналына исә ул кызының шәхси тормышы турында сорашмавын, әмма моның ялган икәнен белүен әйткән.

Эльсина Хайрова мәшһүр әтисе, модель булуы белән генә түгел, гаугалары белән дә танылды. 2021 елда аны ире олигарх Дмитрий Цветков белән Британиядә йортлар сатып алып, акча «юуда» гаепләделәр. Алар Лондон читендә – Уэнтвортта 22 миллион фунт стерлинг (2 миллиард 484 миллион сум) торган, 2,5 мең квадрат метрлы йортта яшәгәннәр. Шулай ук аларның Лондонда 2 миллиард сумлык йортлары булган. Моннан тыш миллионлаган фунтлык Дубайда һәм Кипрда йортлары, автомобильләре, ювелир әйберләре булуы билгеле. Алар 2021 елда аерылыша, Эльсина иреннән байлыкның бер өлешен яшереп алып калган, дип гаепләп язалар. Шул исәптән, 1 миллион фунт стерлинг (112 миллион сум) торган сумкалар коллекциясен дә иреннән яшереп алып калган, имеш.

Британия басмасы исә: «Аларның аерылгысыз пар икәннәре күренеп тора иде», – дип язганнар, Том Крузның хатын-кызны күреп «хәле киткән» икәненә басым ясаганнар. Басма аларның ничек киенгәннәрен дә яза. Хайрова бриллиант бантлы кара күлмәктән булган. Крузны фотога төшәргә чакырганнар, әмма ул баш тарткан.

Актер Том Круз исә – Голливудның иң танылган актерларының берсе. Ул 3 тапкыр өйләнгән, өчесе дә – Голливуд актрисаларына. Өченче хатыны Кэти Холмс белән 15 ел элек аерылганнан соң, беркем белән дә рәсми кушылмаган. Ул җырчы Шакира белән очраша, дип тә, аннары «Миссия невыполнима» фильмындагы актриса Хейли Этвелл белән очраша, дип тә язалар.

Хайров Ринат Шамил улы 1964 елда Әлмәттә туган. Казан финанс институтын тәмамлый, салым инспекциясендә, финанс министрлыгында, банкларда эшли. 1998-2007 елларда –- салым инспектциясе җитәкчесе. 2007-2010 елларда – Россия Оборона министры киңәшчесе. 2011-2020 елларда – Татарстаннан Дәүләт Думасы депутаты.