Башкортстанның Куергазы районы администрациясе башлыгы Юлай Ильясов махсус хәрби операциягә китү нияте турында әйткән. Кичә кич ул шәхси блогында пост язган. Түрә республика башлыгы Радий Хәбировка теләктәшлек белдергәне өчен рәхмәт әйткән. Бу хакта «Мой Башкортостан» сайты яза.
«Үзебезнекеләр янына китәм (русча текст – Ухожу к СВОим). Радий Фәритовчика бу карарны хуплаганы өчен рәхмәт», – диелгән аның язмасында.
Фото: © Социаль челтәрләр
Язылучыларының күбесе Юлай Ильясовны хуплаган һәм хәрби хезмәттә уңыш теләгән. Шулай ук Башкортстанның башка районнары башлыклары да бу карар өчен хөрмәт белдергән.
«Ох, Юлай Талхович, шундый карар... Үзегезне саклагыз... Мондый җитәкче безгә монда да бик кирәк», «Бу карарыгыз хөрмәткә лаек!!! Уңышлар!», «Ирләрчә адым. Хәзер иң мөһиме – исән-сау әйләнеп кайтыгыз! Аллаһ ярдәм итсен!» – дигән комментарийлар язганнар.
Юлай Ильясовка 54 яшь. 2010-2012 елларда ул Башкортстанның Җир һәм милек мөнәсәбәтләре министрлыгын җитәкли, 2005-2008 елларда Башкортстанның Яшьләр сәясәте дәүләт комитеты җитәкчесе була. Шулай ук 2008-2010 елларда Уфаның Киров районы администрациясен җитәкли. 2019 елда республиканың Куергазы районы администрациясе башлыгы итеп билгеләнә.