«Эксперименталь дуэт көтелә»: Ришат Фазлыйәхмәтов халыкны ни белән шаккатырырга уйлый?
Җырчы Ришат Фазлыйәхмәтов бу арада үз концертына әзерләнеп йөрү белән мәшгүль.
Ришат Фазлыйәхмәтовның Казанда булачак концертында эксперименталь дуэт көтелә. Тамашаны алып баручылар элек бер тапкыр да дуэт буларак эшләмәгәннәр. Алар – «Татар радиосы» баш мөхәррире Рамил Шәрәфиев һәм «Салават» җыр театрында күп еллар эшләгән Таһир Гайнуллин.
Рамил сүзләренчә, ул һәм Таһир әфәнде үзара, гомумән, таныш булмаганнар. «Бер-беребезнең бар икәнен белә идек без, әлбәттә, тик моңа кадәр күрешкәнебез юк иде», – ди ул.
«Тәкъдим ителгән һәр дуэт – яңа тәҗрибә бит инде ул. Ә Таһир абый 16 ел дәвамында Салават абый төркемендә эшләгән, нәрсә дисәң дә, дәрәҗәле алып баручы», – ди Рамил.
Гонорар турындагы соравыма, Рамил: «Без Ришат белән дуслар, шуңа күрә аннан акча алу теләгем юк. Ә Таһир абый белән алар үзләре сөйләшкәндер, кысылмыйм», – диде.