Еш кына егетләр белән кызлар интернетта танышканнан соң бер тапкыр очраша да, башка күрешеп тә тормый. Экспертлар кызларның беренче очрашуда ясый торган хаталарын әйткән. Бу хакта «МИР» телеканалы яза.
Иң еш хата – егет нидер белән сыйларга яки сатып алып бирергә тәкъдим итсә, кыз уйламыйча да ризалаша. Белгечләр тәкъдимнән баш тартмаска, ләкин, егетнең юмартлыгын сынап, имтихан да ясамаска киңәш итә.
Кызларга беренче очрашуга барганда ук гомеренең иң әһәмиятле көненә әзерләнгәндәй купшыланып киенергә дә кирәкми. Джинсы белән кроссовкидан килгән егеткә дәгъва белдерү дә урынлы түгел.
Өченче хата – беренче очрашуда ук алдагы егетләрең турында сөйләп бетерү. Егеттән дә элек йөргән кызлары турында сораштырмагыз.
Кыз үзе турында гына сөйләп тормасын. Егетләр мондый кызларны үзенә гашыйк бытбылдык дип уйларга мөмкин. Егетнең мавыгулары турында сорашыгыз, икегезгә дә кызык теманы табып сөйләшегез.
Очрашу вакытында телефон шалтыраса, читкә йөгереп китеп, телефонны кул белән каплап сөйләшмәү хәерле. Киресенчә, яңа танышыгыз каршында сөйләшегез. Шулай итеп, кыз егеткә ышануын аңлата.
Һәм соңгысы, кыз егеткә итагатьле булырга мөмкинлек бирергә тиеш. Егет ишек ачып торганын, баскычтан төшкәндә кул биргәнен көтеп торырга була, диелә хәбәрдә.