Егет белән кыз иске креслоны тәрәзәдән ыргыткан һәм урамдагы әбине үтергән
Әби эте белән урамда йөрергә чыгып барган чакта һәлак була.
3 мартта Новосибирск шәһәрендә урамда бер әби һәлак булган. Аның өстенә күп катлы йорт тәрәзәсеннән кресло килеп төшкән. Бу турыда РЕН ТВ яза.
80 яшьлек әби шәһәр үзәгендә эте белән урамга чыга. Ул подъезд баскычыннан төшәргә дә өлгерми. Кресло өстән нәкъ әби өстенә килеп төшә. Әби кырыйга атылып бәрелә. Имгәнгән әби урында ук вафат була.
Соңрак ачыкланганча, җиденче катта яшәүче яшь ир белән хатын иске җиһазлардан котылырга җыена. 20 яшьлек егет белән 24 яшьлек кыз креслоны урамга атып бәрә. Хәзер аларны кулга алганнар.
Егет белән кызны ике елга кадәр иректән мәхрүм итүләре ихтимал, диелә хәбәрдә.