«Эчемдәгесен шушы шигырьгә салдым...» – Зәмирә Рәҗәпова яңа җырының тарихын сөйләде

Тапшырулар алып баручы, соңгы вакытта җырчы буларак та сәхнәләрдә чыгыш ясаучы Зәмирә Рәҗәпова яңа җырының тарихын сөйләгән. «Шулай булыр» дигән җырны артист быелгы яңа концерт программасында, тормышының үзәк өзгеч авыр вакытын тасвирлаган өлешендә башкарырга җыена.

«Бу җырның сүзләрен Ләйлә Дәүләтова хастаханәдә ятканда яза. Тормышындагы авыр вакыйгалар өстенә, аңа табиблар «баш миеңдә шеш » дигән диагноз куя. «Төне буе яздым, эчемдәгесен шушы шигырьгә салдым, якынча кырыкка якын куплет язылды», – дип сөйләгән иде ул.

Бу шигырьгә талантлы композитор Айдар Тимербаев көй иҗат иткәч, миңа җибәрде. «Тыңлап кара әле, синең тембрга туры килә», – диде. Бу җыр миңа тембрально гына түгел, бөтен фәлсәфәсе, табигате белән аваздаш. Шуңадырмы, мин аны бик яратып башкарам.

Әлбттә, үземнең «Әй язмыш, язмыш..» дип исемләнгән программама да керттем. Җыр музыкаль мәйданнарда бар, «Шулай булыр» дип эзләгез», – дип сөйләгән артист.