Табиб Наталья Шиндряева картаюны тизләтә торган яшерен ялкынсыну турында сөйләде. Медицинада бу процесс «акрын баручы ялкынсыну» дип атала. RT белән әңгәмәдә эксперт мондый «картаю»ны организм эчендә пыскып яткан кечкенә ут белән чагыштырды.
Наталья Шиндряева аңлатканча, гадәти салкын тигәндә организм куркыныч сигналы бирә, ә акрын баручы ялкынсыну вакытында кеше үзен яхшы хис итә, шул ук вакытта иммунитет озак вакыт яшерен куркыныч режимында кала. Шиндряева сүзләренчә, бу процесс кан тамырлары стеналарын зарарлый, тукымаларны хәлсезләндерә һәм аларның тузуын тизләтә.
«Мондый халәтнең төп сәбәбе — хәзерге яшәү рәвеше: даими стресс, рационда эшкәртелгән ризыклар һәм тиз үзләштерелә торган углеводларның артык күп булуы, йокы җитмәү һәм хроник арыганлык иммунитет эшчәнлегенең бозылуына китерә. Нәтиҗәдә, иммунитет ялкынсыну аксымнарын алар булырга тиеш булмаган урыннарда бүлеп чыгара», – дип ассызыклады ул.
Табиб билгеләп үткәнчә, яшерен ялкынсыну атеросклероздан алып матдәләр алмашы бозылуларына кадәр иң куркыныч авыруларның башлануына китерә.